البط شال عدي الجبال و البحـور
ياما نفسي اهج .. احج ويا الطيور
أوصيك يا ربي لما اموت .. و النبي
ما تودنيش الجنه .. للجنه ســــور
عجبي !!
طال انتظاري للربيع يرجـع
و الجو يدفا و الزهور تطلـع
عاد الربيع عارم عرمرم شبـــاب
إيه اللي خلاني ابتديت افـزع ؟
عجبي!!
و لو انضنيت و فنيت وعمري انفرط
مش عاوز الجأ للحلول الوســــــط
و كمان شطط و جنون مانيش عــاوز
يا مين يقول لي الصح فين والغلـــط
عجبي !!
عاد الربيع كأنه طعم الحــب
و الحب نار جوه العروق بتصب
أتمتع ازاي بيه وانا متقطــع
من كتر خوفي لا في الخطيئة يطب ؟
عجبي!!
ازاي شبابنا يقوم و ياخد دوره
من غير صراخ يئذيه و يجرح زوره
يا هلتري أحسن له يقعد ساكــت
أو ينترك و لو خرج عن طــــــوره ؟
عجبي!!
عيني رأت عصفور ووياه ابــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــوا
عجبي !!
أحسن ما فيها العشق و المعشقـة
و شويتين الضحك والتريقــــــة
شفت الحياة . لفيت . لقيت الألـذ
تغييرها . و ده يعني التعب و الشقا
عجبي !!
عجبي علي العجب العجيب العجاب
لما الحقيقة تطل بعد احتجاب
و تروق و تحلا وفجأة تصبح مفيش
كمثل طراطيش بحر ياما خد و جاب
عجبي !!
في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!
وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي !!
الحلو يمّ اليمّ صابـــح رايح
سارح في حضن الميه سابح سايح
الحلو داب في البحر . قلت أدوقه
وجدت لسه البحر برضك مالح
عجبي !!
يا كل كلمة للعجب في قامـــــــوس
إنسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي !!
الموج تلول تهبط وتطلع تلــــول
يا بحر خدني الشط صاحبك ملــول
و لا بلاش الشط ح اعمل به أيـه
ده ريحته طحلب مهري و ام الخلول
عجبي !!
عيني رأت مخلوق في غاية البشاعة
أنا قلت له لما تأملته ساعــة
اللذه و الموت علموك اللــزج
و أنا علموني الفلسفة والشجاعة
عجبي!!
غطس وقب الموج نهود بمــبي
من ألف جيل جمالات ما تعلم بي
يا قلبي عيب دول امهاتنا القدام
أستغفر الله العظيم ربــــــي
عجبي !!
علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و إلا فلا
عجبي !!
ظهر المسيح الحي علي سفح ربـــوة
و نزل بهالة الضي و قعد في قهـوة
بصوا .. تعالوا .. قالوا خليه في حاله
الناس في حالهم يا بني .. مالهمش دعوة
عجبي !!
لولا اختلاف الرأي يا محــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي!!
يا وردة قلبي معاكي في الريح لعب
لا تعبتي م الريح و لا قلبي تعـــب
إحنا كده : نرتاح في صخب الجنون
و في السكون بنخاف قوي و نترعب
عجبي !!
ما انتاش بتلعب ليه يا روح بابا ؟
و لا عسكري و لا لص في عصابة ؟
إلعب أسد أو ديب رهيب أو غـزال
دي الدنيا في نهاية المطاف غابـة
عجبي !!
ورد في ورق سلوفان يا حلوة اهديلك ؟
و الا انقله بالطين في شتلة و اجيلك
الأولاني لو وحا بحنــانــي
عجبي علي التاني بإيه يوحيلــــك
عجبي !!
أنا قلبي كوكب و انطلق في المدار
حواليكي يا محبوبتي يا نور ونار
يلف مهمــــا يلف ما بيكتفيش
وتمللي نصه ليل و نصه نهـــــار
عجبي !!
الأرض شوك أيوه لكين هايـــش
و الحمرة مش يعني الطريق حايش
دي دمنا السيال .. وبُشرة خير
إن انتي عايشه و إن أنا عايش
عجبي !!
إيه اللي خدته من مرور السنـين
يا قلبي إلا دمعتك و الأنيـــــين
بتئن و بتفرح و ترجع تحــــــن
مع إن مش كل البشـــر فرحانين
عجبي !!
أوقات أفوق و يحل عني غبـايا
واشعر كأني فهمت كل الخبايا
و افتح شفايفي علشان أقول الدرر
ما أقولش غير حبة غزل في الصبايا
عجبي !!
مركب ورق من نفخة تتطوح
ركبتها و الكل بيلوح
سوحت فيها اتنين و خمسين سنه
للآن ... و لا بتغرق و لا تروح
عجبي!!
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديــــد
قد اللي ماشي .. وتحت باطه كتاب
عجبي !!
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــل
وازاي تكفيني لباب القـــــبر؟
عجبي!!
قاعدة قناني الخمر ساكتة و ساهية
مع ابن آدم في الشبه متناهيـــة
مفيش كده روقان في لحظة تشوفهم
و بعدها بلحظه يودوا في داهيــه
عجبي !!
حتة محارة وجدتها في يوم لقيـّة
قالت لي شوف كيف الطبيعة شقية؟
نظرت للكهف اللي فيها ولقيت
إن الطبيعة كمان .. لا أخلاقيــة
عجبي !!
بلياتشو قال إيه بس فايدة فنوني ؟
و تلات وقق مساحيق بيلونونـــي
و الطبل و المزامير و كتر الجعـــير
إذا كان جنون زبوني زاد عن جنوني
عجبي !!
نقطة مرارة كمان علي مشروبي
دوبها يا ساقي حسب مطلوبـــي
طعم الحياة .. مش برضه فيها وفيها ؟
ليالي وردي و نهارات خروبـــــي ؟
عجبي!!
وسط الحطام اتفرجوا يا أنــام
تمثال ملك . و مبوله م الرخام
لتنين نحتهم نفس أسطي الحجــــر
و كانوا ذات يوم كتلتين لسه خام
عجبي !!
عيد و العيال اتنططوا ع القبور
لعبوا استغمايه .. و لعبوا بابور
و باللونات و نايلونات شفتشــي
و الحزن ح يروح فين جنب السرور
عجبي !!
أنا قلبي كورة و الفراودة أكــم
ياما اتنطح و انشاط و ياما اتعكم
و اقول له كله ح ينتهي في المعــاد
يقول بساعتك ؟ ولا ساعة الحكم ؟
عجبي!!
الضحك قال يا سم ع التكشيـــر
أمشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي !!
أهوي الهوى و همس الهوي في العيون
وبسمة المغرم ودمعة الحنـــــون
و زلزلات الحب نهد الصبــــــــا
أكون انا المحبوب أو لا أكـــون
عجبي !!
يا ملونين البيض في شم النسيـم
لون الحنين و الشوق و خمر النديم
ما تعرفوش سايق عليكو النبــي
تلونوا الأيام بلون النعيـــم ؟
عجبي!!
الدنيا صندوق دنيا .. دور بعد دور
الدكة هي .. و هي كل الديكـــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي !!
موضوع: ربعيات صلاح جاهين 4 
الأحد فبراير 14, 2010 5:18 am
